वाड्यात गरम पाण्याचे झरे? भु-गर्भ शास्त्रज्ञ करणार पाहणी

0
2422

प्रतिनिधी/वाडा, दि. 26 : मागील काही महिन्यांपासुन पालघर जिल्ह्यातील डहाणू व तलासरी तालुक्यात भूकंपाचे धक्के जाणवत असतानाच वाडा तालुक्यातील सोनार पाडा येथे गरम पाण्याच्या झर्‍यांप्रमाणे जमिनीतून वाफा व बुडबुड्यांसह निघणारे गरम पाणी आढळून आले आहे. मात्र विद्युत खांबाच्या शेजारी असलेल्या खड्ड्यात हे गरम पाणी आढळून आल्याने त्याचे नेमके कारण भु-गर्भ शास्त्रज्ञांच्या पाहणीनंतरच स्पष्ट होणार आहे.

आज, शुक्रवारी सकाळी 7 च्या समुारास वाड्यापासून हाकेच्या अंतरावर असलेल्या सोनार पाडा येथील एका विजेच्या खांबाजवळून वाफा येत असल्याचे येथील काही ग्रामस्थांच्या लक्षात आले. यामागचे कारण समजण्यासाठी त्यांनी जवळ जाऊन पाहिले असता विद्युत खांबाच्या शेजारी असलेल्या खड्ड्यातील पाण्यातून आवाजसह बुडबुडे येत असल्याचे त्यांच्या निदर्शनास आले. यावेळी त्यांनी पाण्यात हात घातला असता पाणी अतिशय गरम होते व हाताला चटके बसत होते. जवळच विजेचा खांब असल्याने जमिनीत वीज पसरुन पाणी गरम झाल्याची शंका उपस्थित झाल्याने नागरीकांमध्ये काही काळ भीतीचे वातावरण निर्माण झाले होते. मात्र वीज पुरवठा खंडित असताना देखील पाण्यातून गरम वाफा निघत असल्याचे पाहून एकच कुतूहल निर्माण झाले व बघता बघता या ठिकाणी नागरिकांची गर्दी झाली. तर शाळकरी मुलं या गरम पाण्याची मजा घेत होते.

दुसरीकडे वाड्याचे तहसीलदार दिनेश कुर्‍हाडे यांना याबाबतची माहिती दिली असता त्यांनी स्वतः याठिकाणी येऊन पाहणी केली व विद्युत खांबाशी संपर्क झाल्याने हे पाणी तापले असल्याची शक्यता व्यक्त करुन आम्ही भु-गर्भ शास्त्रज्ञांना पाचारण केले असून ते लवकरच या बाबतीत खुलासा करतील, असे सांगितले.