घर कोसळून 1 ठार
वार्ताहर/बोईसर, दि. 25 : डहाणू व तलासरी तालुक्यातील अनेक गाव-पाड्यांमध्ये आज मध्यरात्री एकच्या सुमारास 3.6 रिश्टर स्केल, 3.8 रिश्टर स्केल व 2.6 रिश्टर स्केल अशा तीव्रतेचे एकापाठोपाठ एक असे दहा मिनिटात तीन मोठे धक्के बसले. भूकंपाच्या या धक्क्यांमुळे नागझरी बसावला पाडा येथील एक घर कोसळून रीशा मदन मेघवाले या 55 वर्षीय इसमाचा जागीच मृत्यू झाला आहे.
मागील 2 ते 3 दिवसांपासुन डहाणू व तलासरी भागात मुसळधार पाऊस कोसळत असल्याने भर पावसात येथील शेतकरी शेतीची कामे आवरून गाढ झोपी गेले असताना आज, मध्यरात्री एकच्या सुमारास 3.6 रिश्टर स्केल तीव्रतेचा मोठा धक्का बसला. तर पुढील 10 मिनिटांत 3.8 व 3.2 रिश्टर स्केल तीव्रतेचे आणखी दोन मोठे धक्के बसले. विशेष म्हणजे सकाळी 9 वाजेपर्यंत सौम्य धक्के सुरूच होते. डहाणू व तलासरी तालुक्यातील धुंदलवाडी, शिसणे, हळदपाडा, मोडगाव, चिंचले, पारडी, आंबोली, सासवद, तलासरी, उपलाट, नागझरी, आंबेसरी, वंकास, बहारे आदी गावांना हे धक्के जाणवले. दरम्यान, रात्री गाढ झोपेत असलेल्या लहान बालकांपासून वृद्धांपर्यंत असे सर्वच नागरीक या भूकंपाच्या धक्क्यांमुळे खडबडून जागे होऊन मुसळधार पावसात त्यांना घराबाहेर रात्र जागून काढावी लागली.
तर दुसरीकडे नागझरी बसावला पाडा येथील रीशा मेघवाले यांचे कुडाचे घर या भूकंपाच्या धक्क्याने कोसळले. यावेळी घरामध्ये झोपलेल्या रीशा मेघवाले व त्यांच्या पत्नीच्या अंगावर घर कोसळले. यात रिशा मेघवाले यांच्या छातीवर घराचे मोठे लाकूड पडल्याने त्यांचा जागीच मृत्यू झाला. तर सुदैवाने त्यांची पत्नी व दुसर्या खोलीत झोपलेल्या त्यांच्या दोन मुलांना कोणतीही इजा झाली नाही.
आमदार धनारे व जिल्हाधिकार्यांकडुन पाहणी
नागझरी येथील या घटनेची आमदार पास्कल धनारे, नुकताच पदभार स्वीकारलेले जिल्हााधिकारी कैलास शिंदे तसेच पोलीस अधिकारी व भाजपाच्या पदाधिकार्यांनी प्रत्यक्ष पाहणी केली.
डहाणू व तलासरी तालुक्यामध्ये 3 ऑक्टोबर 2018 रोजी भूकंपाचा पहिला धक्का जाणवला होता व तेव्हापासून सुरू असलेला भूकंपाचा थरथराट अद्यापही थांबलेला नाही. आतापर्यंत डहाणू व तलासरी तालुक्यातील लहान-मोठ्या गाव पाड्यांना गेल्या नऊ महिन्यात भूकंपाचे 20 ते 25 मोठे धक्के बसले आहेत. तर सौम्य धक्के सतत जाणवत असल्याने या धक्क्यांचे मोजमाप नाही.
- तुम्ही Youtube वर News Channel किंवा News Portal चालवता का? मग तुमच्यासाठी अतिशय महत्वाची बातमी आहे!
- केळवे समुद्रात चार मुलांचा बुडून मृत्यू!
- मुजोर विराज उद्योजका विरोधात कामगार आक्रमक
- घिवलीच्या पुनर्वसनाची मागणी
- महिलेला दोन लाखाचे सोन्याचे दागिने रेल्वे पोलिसांनी केले परत
